26/08/2015 by admin55
Fab Lab opnaði huga minn
Viðtal við Arnar Daða Þórisson 22 ára Breiðhylting sem kynntist Fab Lab í gegnum Menntun núna verkefnið 2014 og hefur verið fastagestur og leiðbeinandi þar síðan. Arnar Daði Þórisson er fæddur og uppalinn í Breiðholti, hann á þrjú systkin, kærustu og þriggja ára gamla dóttur: það var rosalega gaman að alast hér upp alltaf mikið í gangi, í dag er hverfið allt öðruvísi en fólk heldur, fyrir 10-15 árum var erfitt að skilja hjólið sitt eftir úti en það er hægt að gera það núna, allt orðið miklu rólegra, flottara og það er meira við að vera segir Arnar.
Arnar var í Hólabrekkuskóla, leiðin lá síðan í grunnnám rafiðna fyrst í Tækniskólann og síðan í Fjölbrautaskólann í Breiðholti en hann lauk ekki náminu. Aðspurður um ástæður þess þá sagði hann þær vera skort á áhuga, ég fann ekki þörfina til að læra, vissi að það væri skynsamlegt en hafði meira gaman af því að prufa mig sjálfur áfram með því að taka sundur og setja saman hluti.
Kynntist Fab Lab í tengslum við Menntun núna verkefnið
Arnar tók þátt í Menntun núna verkefninu í Breiðholti sem varð til þess að hann kynntist Fab Lab en á þeim tíma var hann atvinnulaus og fékk boðun frá Vinnumálastofnun um að mæta á námskeið hjá Námsflokkunum þar sem þrír dagar voru bóklegt nám og einn dagur í Fab Lab en fyrsta daginn sem hann mætti þá varð hann heillaður: Fab Lab opnaði huga minn en ég hafi verið að hugsa um að koma og var með nokkur verkefni í huga en það að koma á staðinn galopnaði hugann og ímyndunaraflið sprakk út en það er svo rosalega margt sem hægt er að gera hérna segir Arnar.
Og ertu búinn að vera meira og minna í Fab Lab síðan, að hverju ertu að vinna núna? Já eiginlega, nú er ég að búa til box til að stokka fyrir þig, upphaflega hugmyndin var að útbúa box fyrir borðspil sem heitir „Magical gathering“ en það eru mörgum sem finnst erfitt að stokka segir Arnar sem hefur mjög gaman af ýmiskonar borðspilum.
Langar að kenna fólki að nýta sér Fab Lab
Eftir fyrsta námskeiðið þá gafst Arnari kostur á, í gegnum Vinnumálastofnun, að fara á annað námskeið sem snérist eingöngu um Fab Lab svokallaða Fab Lab smiðju sem Mímir símenntun bauð upp á. Í kjölfarið fór Arnar að taka virkari þátt í almennri starfsemi Fab Lab, aðstoða í opnum tímum og vera leiðbeinandi á námskeiðum. Maður dettur inn í að hjálpa fólki, man eftir konu sem ég varði um 2 tímum með þó ég hafi verið að drífa mig heim, mann langar svo rosalega að hjálpa fólki til að læra á tækin og láta hugmyndir sínar verða að veruleika segir Arnar og tíminn er fljótur að líða.
Hvað langar þig síðan að gera með þessa reynslu og þekkingu í framtíðinni? Mig langar að kenna fólki á Fab Lab. Ertu þá að hugsa um að fara í Fab Academy sem er nám fyrir leiðbeinendur? Það er ekki víst, eins og núna þá var ég að hjálpa til á námskeiði Innoent fyrir 8-14 ára krakka sem voru að læra að hanna og búa til hluti í Fab Lab segir Arnar. Ertu kennari í þér? Þó mér finnist gaman að vera með krökkunum þá sé ég mig frekar með fólki sem er komið með grunnþekkingu og er að vinna að ákveðnum verkefnum.
Langar að verða rafeindavirki
En hvað með rafmagnið ertu að hugsa um að halda áfram að læra eitthvað í tengslum við það? Mig hefur alltaf langað til að verða rafeindavirki og vinna með litlu hlutina, laga þá og búa til skemmtilega hluti segir Arnar, samanber stokkandi spilaboxið. Í dag er ég með vinnu og námið bíður ( er á „hold“) en ég kem líklega til með að leiðbeina á fleiri Fab Lab námskeiðum hjá Innoent og kynna smiðjuna gagnvart frístundaheimilum segir Arnar.
Allir eiga erindi í Fab Lab
En hverjir eiga erindi í Fab Lab? Allir, finnst mér, ég sé Fab Lab þannig fyrir mér að hér er hægt að vinna hluti sem gera lífið þægilegra eða umhverfið fallegra, þeir sem hafa áhuga á blómum geta hannað blómastanda o.s.frv. segir Arnar. Það er sem sagt engin hugmynd of galin fyrir Fab Lab.
Ljósmynd og kvikmyndataka: Sigurbjörg Jóhannesdóttir